ഭക്തിയുടെ പരകോടിയും കണ്ണീരൊപ്പുന്ന കരങ്ങളും: കാനാടികാവ് തിറവെള്ളാട്ട് മഹോത്സവം

ഓരോ മനുഷ്യന്റെ ജീവിതത്തിലും അഭയത്തിന്റെ, ആശ്വാസത്തിന്റെ ചില തുരുത്തുകളുണ്ടാകും. ആധികളും വ്യാധികളും വന്ന് വേട്ടയാടുമ്പോൾ, ഇനി ആരുമില്ലെന്ന് തോന്നി നെഞ്ച് പൊട്ടുമ്പോൾ, ഓടിയെത്താൻ ഒരു തിരുനടയുണ്ടാകുന്നത് ഒരു വലിയ പുണ്യമാണ്. അത്തരത്തിൽ, പ്രപഞ്ചത്തിന്റെ വിവിധ കോണുകളിൽ നിന്നും ഒഴുകിയെത്തുന്ന ലക്ഷക്കണക്കിന് മനുഷ്യരുടെ കണ്ണീരൊപ്പുന്ന, മണ്ണും വിണ്ണും ഒരുപോലെ ഭക്തിയിൽ അലിയുന്ന ഒരു പുണ്യോത്സവമുണ്ട്—പെരിങ്ങോട്ടുകര കാനാടികാവ് ശ്രീ വിഷ്ണുമായ കുട്ടിച്ചാത്തൻ സ്വാമി ക്ഷേത്രത്തിലെ തിറവെള്ളാട്ട് മഹോത്സവം.
​കേവലം ചടങ്ങുകളോ വാദ്യഘോഷങ്ങളോ മാത്രമുള്ള ഒരു സാധാരണ  ഉത്സവമല്ല ഇത്. ശ്രീ വിഷ്ണുമായ സ്വാമി തന്റെ ഭക്തരെ കാണുവാനും ഭക്തരുടെ ക്ഷേമാന്വേഷണങ്ങൾ തിരക്കുവാനും മനസ്സിലാക്കുവാനും ക്ഷേത്രത്തിൽ നിന്നും പുറത്ത് വരുന്ന ചടങ്ങ് കൂടിയാണ് ഇത്. ഭഗവാന്റെ ദീപാരാധനയിലും എഴുന്നെള്ളിപ്പിലും പങ്കെടുക്കുന്നവർക്ക് ഭഗവാന്റെ സർവ്വ ഐശ്വര്യങ്ങളും അനുഗ്രഹങ്ങളും ലഭിക്കും.

​അന്തരീക്ഷം ഉണർത്തുന്ന ദ്രാവിഡ വീര്യം

​ഉത്സവനാളുകളിൽ കാനാടികാവിന്റെ മണ്ണിലേക്ക് ചുവടുവെക്കുമ്പോൾ തന്നെ വല്ലാത്തൊരു ആത്മീയ ഊർജ്ജം നമ്മെ പൊതിയുന്നത് അനുഭവിക്കാൻ കഴിയും. അന്തരീക്ഷത്തിൽ അലയടിക്കുന്ന പവിത്രമായ മന്ത്രോച്ചാരണങ്ങൾ, ചെണ്ടമേളത്തിന്റെയും ഇലത്താളത്തിന്റെയും ദ്രാവിഡ വീര്യം തുടിക്കുന്ന നാദങ്ങൾ, കരിമരുന്നിന്റെ മണം, അതിനെയെല്ലാം ഭേദിച്ച് ഉയരുന്ന ഭക്തരുടെ മനം നൊന്തുള്ള ഓരോ വിളികളും… കാനാടികാവ് അക്ഷരാർത്ഥത്തിൽ ഒരു ദേവലോകമായി മാറുകയാണ് ഇവിടെ.
ശാക്തേയ പൂജകൾക്കും വഴിപാടുകൾക്കും ഏറെ ഫലസിദ്ധിയുണ്ടെന്നാണ് വിശ്വാസം. തങ്ങളുടെ മാതാപിതാക്കളെയും ഗുരുക്കന്മാരെയും ധ്യാനിച്ച്, കാടിന്റെയും പ്രകൃതിയുടെയും കാവലാളായ വിഷ്ണുമായ സ്വാമിയുടെ സന്നിധിയിൽ സമർപ്പിക്കുന്ന പ്രാർത്ഥനകൾ ഒന്നുപോലും പാഴായിപ്പോകില്ലെന്ന് അനുഭവസ്ഥരായ പതിനായിരക്കണക്കിന് ഭക്തർ സാക്ഷ്യപ്പെടുത്തുന്നു.

​”ഞാൻ കൂടെയുണ്ട്“ എന്ന ഉറപ്പ്: കാട്ടുപോത്തിന്റെ പുറത്തേറി അസുരനിഗ്രഹം  നടത്തിയ ആ വീരനായകൻ, തന്റെ ഭക്തരെ കാത്തുരക്ഷിക്കാൻ രൗദ്രവും വീര്യവും ഒത്തുചേർന്ന രൂപത്തിൽ നടപ്പുരയിലേക്ക് എഴുന്നള്ളുമ്പോൾ ജനസാഗരം ഒരേ മനസ്സോടെ കൈകൂപ്പി നിൽക്കും.
​ആ തിരുരൂപത്തിന് മുന്നിൽ വന്ന് സങ്കടങ്ങൾ പറഞ്ഞു വിതുമ്പുന്ന ഓരോ ഭക്തനെയും, അവരുടെ കൂടെ ഞാനുണ്ട്, “നിന്റെ ആധികളെല്ലാം ഞാൻ ഏറ്റെടുത്തിരിക്കുന്നു” എന്ന് ഭഗവാൻ അരുളിച്ചെയ്യുന്ന ആ നിമിഷം ഏതൊരു മനുഷ്യന്റെയും കണ്ണ് നനയിക്കും. ലോകം മുഴുവൻ കൈവിട്ടാലും തങ്ങളെ കാക്കാൻ കാനാടിക്കാവിൽ ഒരു നാഥനുണ്ടെന്ന ആത്മവിശ്വാസമാണ് ഭക്തർക്ക് ഈ ദർശനത്തിലൂടെ ലഭിക്കുന്നത്.

​ദോഷങ്ങൾ കരിഞ്ഞുപോകുന്ന വിശുദ്ധ മണ്ണ്

​കുടുംബത്തിലെ കടുത്ത അശാന്തി, ശത്രുദോഷങ്ങൾ, ബിസിനസ്സിലെ തകർച്ചകൾ തുടങ്ങി ജീവിതത്തിന്റെ വഴികളിൽ നേരിടുന്ന സകല പ്രതിസന്ധികളെയും ഈ ഉത്സവകാലത്തെ പ്രാർത്ഥനയിലൂടെ ഭഗവാൻ ഭസ്മമാക്കുന്നു. തങ്ങളുടെ ഉള്ളിലെ സർവ്വ ദുരിതങ്ങളും സ്വാമിയുടെ തൃപ്പാദങ്ങളിൽ സമർപ്പിച്ച്, വറ്റാത്ത പ്രത്യാശയുടെയും സമാധാനത്തിന്റെയും വെളിച്ചവുമായാണ് ഓരോ ഭക്തനും ഈ തിരുനടയിൽ നിന്നും പടിയിറങ്ങുന്നത്.
​അകലെയാണെങ്കിലും അരികിലാണെങ്കിലും, ഈ ഉത്സവ നാളുകളിൽ കാനാടികാവിലെ പ്രപഞ്ചശക്തിയെ ഉള്ളറിഞ്  പ്രാർത്ഥിക്കുന്ന ഏവരുടെയും വീടുകളിൽ  സർവ്വൈശ്വര്യങ്ങളും സമാധാനവും നിറയും എന്നത് ഭക്തർക്ക് കേവലം ഒരു വിശ്വാസമല്ല, അനുഭവമാണ്.

​കാനാടികാവിലെ ഈ പുണ്യ തിറവെള്ളാട്ട് മഹോത്സവ നാളുകളിൽ, നമുക്കും ആ തിരുനടയിൽ മനസ്സ് സമർപ്പിച്ച് പ്രാർത്ഥിക്കാം. ഭഗവാൻ വിഷ്ണുമായ കുട്ടിച്ചാത്തൻ സ്വാമിയുടെ ദിവ്യമായ കാവൽ എന്നും നമുക്ക് തുണയാകട്ടെ.